Lassečielggadusa doaimmaheapmi ja diehtunaddin

Ášši várás, mii gieđahallojuvvo Oadjorievttis, sáhttá doaimmahit ođđa čielggadusa nuppástusohcanreivve čuovusin ja maŋŋelisge. Lassečielggadusa gánnáha doaimmahit nu fargga go vejolaš gieđahallamiiboahtima maŋŋá dahje dan doaimmaheamis gánnáha goittot almmuhit.

Oadjoriekti sáhttá háhkat lassečielggadusa maiddái iežas álgaga vuođul. Lassečielggadus sáhttá bivdojuvvot áššáiosolaččas dahje ovdamearkka dihte eará eiseválddiin. Ášši čoavdima maŋŋá boahtán lassečielggadus ii váldojuvvo vuhtii ja čielggadus máhcahuvvo dan sáddejeaddjái.

Oadjoriektái doaimmahuvvon lassečielggadusa birra almmuhuvvo čálalaččat áššáiosolaččaide. Sidjiide várrejuvvo dilálašvuohta oahpásmuvvat lassečielggadussii ja addit dan geažil iežaset čálalaš čielggadusa.

Lassečielggadusa doaimmaheapmi šleađgapoastta mielde dahje fáksemiin

Oadjoriektái sáhttá váldit oktavuođa ja áššái, mii lea Oadjorievttis dutkojuvvomin, sáhttá doaimmahit lassečielggadusa maiddái šleađgapoastta mielde dahje fáksemiin. Go Oadjoriektái doaimmahuvvo čielggadus šleađgapoastta mielde, de galgá áinnas geavahit čujuhussan vakuutusoikeus@oikeus.fi. Dalle sáddejeaddji oažžu šleađgapoastta mielde almmuhusa šleađapoastadieđu joavdamis Oadjoriektái.

Oadjoriekti ávžžuha ahte lassečielggadusa, mii doaimmahuvvo šleađgapoastta mielde, sisdoallu galggašii boahtit ovdan šleađgapoastta teakstaoasis. Čielggadus ii galggašii doaimmahuvvot čuovusfiilan. Oadjoriekti gidde nuppástusohcciid fuopmášumi daidda diehtodorvováttisvuođaide, mat leat šleađgapoastajohtolagas. Šleađgapoastta mielde ii galggašii doaimmahit čiegusin doallat oaivvilduvvon dahje muđui rašis dieđuid.

Áššegolut ja vuoigatvuođaveahkki

Vuoigatvuođaveahkki Oadjorievttis lea nuvttá. Eanaš áššegirjjiin, mat bivdojuvvojit sierra, berrojuvvo goittotge áššegirjemáksu. Jos nuppástusohcci geavaha áššealbmá dahje veahki, de son lea geatnegahtton máksit dása mávssu. Vuostebeallin leahkki lágádus sáhttá gáibádusa vuođul geatnegahttot buhttet nuppástusohccái áššis šaddan áššegoluid, jos nuppástusohcci áššis ovdanbuktin gáibádusat dohkkehuvvojit.

Olbmui sáhttá vuosttažettiin ekonomalaš sajádahkii guoskevaš eavttuid mielde mieđihit vuoigatvuođaveahki dan ášši várás, mii gieđahallojuvvo Oadjorievttis. Dalle áššegolut máksojuvvojit stáhta ruđain juogo ollásit dahje muhtumassii. Vuoigatvuođaveahkki ohccojuvvo vuoigatvuođaveahkkedoaimmahagas.

Statistihkkadieđut

Oadjorievtti bálvalusas leat ollesáigásaččat sullii 110 olbmo, geain áššiid čoavdimii oassálasti láhkageavahanbargovehkii gullet sullii 60 olbmo.

Oadjoriekti čoavdá jahkásaččat sullii 10.000 ášši. Stuorámus áššejoavkun leat sierra bargoealáhatáššit sihke bargguhisvuođadorvo-, oahppadoarjja-, bargobárte- ja rihkusvahátáššit. 2008:s čovdojuvvojedje 9.218 váidaga. Váiddavuloš mearrádus rievdaduvvui 1.409 áššis dahjege rievdadanproseanta lei 15,3 %. Mearrádusa jávkadeapmái guoskevaš ohcamušat čovdojuvvojedje 531. Dain dohkkehuvvojedje 390 dahjege 73,4 %. 2008:s Oadjoriekti doaimmahii njálmmálaš gieđahallama njealje áššis.

Áššit gieđahallojit Oadjorievttis dábálaččat ohcamušaid boahtima mielde. Ášši mohkkáivuohta, riektegeavvanmateriála viiddisvuohta dahje valljugas lassečielggadusaid doaimmaheapmi sáhttet goittotge guhkidit gieđahallanáiggi. Buot áššiid gaskamearálaš gieđahallanáigi lea dáid áiggiid leamaš sullii 11 mánotbaji.